أخْلاقُنا وأخلاقُهم!!! بين الإمام الحسن ومروان بن الحكم!!! (1-3)
أخْلاقُنا وأخلاقُهم!!! بين الإمام الحسن ومروان بن الحكم!!! (1-3)
بقلم جمال أحمد الحسن – 1 يناير 2017م
كثيرٌ منا لا يستوعَب ولا يكاد يُصدِّق ما وصل إليه الإنحطاط الأخلاقي والسلوكي في عهد الدولة الأموية خصوصاً وأن كثيراً ممَّن عايَش هذه الحقبة هُم من الصحابة الكِرَام رضوان الله عليهم… ولكن الواقع المُؤلِم يقُول ذلك… وللأسف الشديد يقُول ذلك!!
منذ أن تناوَشَت سهام الغدر والخيانة أمير المُؤمنين وفارس المشرقين أبي الحسنين عليه السلام ثُمَّ بدأ سبَّه ولعنه على منابر الدولة الأموية… تماشت مع هذه الحادثة وبالتوازي كمان نوعين من الأخلاق… أخلاق نبويَّة مُصطفوية إنسانيَّة وأخلاق أموية شيطانية عُدوانية!!! فلينظُر كلٌ منا أين يصطَف… وبمَ يقتدِي ويهتدِي..
خليفة المُسلمين الراشد الخامس سيدنا الإمام الحسن، كان من شدَّة ما يتحاشَى أن يسمَع شتم أبيه عند ذكره الكريم… دائماً ما يحتمِي بأُمه الزهراء عليها السلام… فكان يقُول الحسن بن فاطمة!!!
– مروان بن الحكم كان والي معاوية على المدينة وكان يسب الإمام علي كل جمعة على منبر رسول الله صلى الله عليه وآله وسلم!! عشان كدي الإمام الحسن ما كان قاعْ يجي يحضر خطبتُو… يقعُد في حجرة جدو لامِن الخُطبة “بي سبَّها ولعنها” تنتهِي وتبدأ الصلاة يجي يصلي ويتخارج!!! ومن المآسي التفقَع المرارة عند سماعها –بَرْضُو- أن يؤُم المُصلِّين زي مروان بن الحكم في أمةٍ فيها ما فيها من الصالحين والعُرفاء أمثال سيدنا جابر بن عبد الله الأنصاري وعبد الله بن عمر وعبد الله بن الزبير وعبد الرحمن بن أبي بكر ومحمد بن أبي بكر وعييييييييييييييك!!!
– أها في يوم من الأيام مروان “فَكَرْ” للحكايي دي… أظنُو وهُو يخطب لاحظ إنو الحسن ماااااااا موجُود!!! واتخيَّلُّو –البعيد- إنُّو الشتائم دي مااااا قاعْ تصلُو شي…
– أها قام بَعَتْلُو واحد من ضِنِيبَاتُو بي “مُرسال” فيهُو شتائم “فيك وفيك وفي أبوك وفي أبوك”… راوي الحديث “الحمد لله” ما ذكرها وُبَرَكة الما ذكرها كانت تزيد القلب حسرة والنفس غمَّة!!! وبي قِلَّة أدبْ وسفاهَة قال ليهُو (ماااااااني شايِفْ لي ليك مثيل غير “البغلة” يقُولُولها أبُوكِي منُو… تقُول ليهم أُمي الفرس)!!!!! وطبعاً اللبيب من غير تفصيل يكُون عرفوُ عاوز يصف بكُل خُبث الإمام الحسن بي شنو وأمُّو السيدة الزهراء بي شنو وأبُوهُو الإمام علي بي شنُو؟؟؟!!! والعياذ بالله من السفاهة وقلة الأدب!!!!!
دا جزء من الأخلاق الأموية…
أها النمشي لي قدام ونشُوف الهدي النبوي القويم تجَلَّى كيف…
الإمام الحسن أول حاجة ما عاقَب (المِرِيسِيلْ) الأموي باعتباره عبد المأمُور!!!
نمرة اتنين شُوفُو ردُّو كان كيف؟؟؟!!!
قالُّو كدي أمشي لي مروانك دا وقُول ليهُو الكلام دا:
(أنا أصلي ماب أرُد عليك شي من الكلام القُلْتُو دا عشان ما أمحُو عنك ما ارتكبته من ذنب –حتى لا تُحَاجِجْني يوم القيامة عند رب العزة- وتقُول ليهُو زي ما أنا شتمتُو هُو شتمني!!! وموعدي وموعدك اليوم داك… إن كُنت صادق… الله بي يجزيك بي صدقك وإن كنت كاذب فالله أشدُّ نقمة!!! وُبس)
…………….
المُتابِع للحوار السابق دا.. أكيد إندَهَش وُقَهَّ وفتَح خشيمُو وشَهَق كمان!!!
إنتُو الدُنيا دي الحصَل فيها شنو؟؟؟
أهل بيت النبي يُسبُّوا ويُلعَنُوا عيني عينك كدي… على منابر الجُمعة كمان؟؟؟!!!
طيب الصحابة البايعِين رُوووحُن لي الله وأسَّسُو دعائم الدين دا وينُنْ؟؟؟
ماهُن شايفين الفَوضَى الحاصلي دي.. وُدُورُن شِنُو كان في المَعْمَعَة دي؟؟؟
التساؤلات المنطقية المُحَيِّرَة دي نحاول نفِك طلاسِمها في الحلقة القادمة بإذن الله بين سيدنا جابر بن عبد الله وسيدنا أبو هريرة بي جيهَة وبين مروان بن الحكم من الجيهة التاني!!!
.
.
.
# عن كعب بن عُجرة رضي الله عنه قال: قال رسول الله صلى الله عليه وآله وسلم: (أُعيذُك بالله من إمارة ِ السُفهاء، قال وما ذاك يا رسول الله؟؟
قال أُمراء سيكُونُون من بعدي، من دخل عليهم فصدَّقهُم بكذبِهم وأعانَهُم على ظُلمهم فليسُوا مني ولستُ منهم ولن يردُوا عليَّ الحوض…
ومن لم يدخُل عليهم ولم يُصدقهم بكذبهم ولم يُعنهم على ظُلمهم فأُولئك مني وأنا منهم وأُولئك يردُونَ عليَّ الحوض)…
إرسال التعليق